1206
دوشنبه 06 آذر 1396
0
ترکی ,
ایکی عالم صدف اولسا ، اونا گوهردی آنا
خلقتین فخـر مـباهــاتینه جـوهـردی آنا
خوش دانیشدیر یوزونی قویما گوره رنج و محن
اوپ اَلین حـرمتـیلن قیمتی یوخ زردی آنا
امرینه ایلـه اطاعـت کـه رضـا ســنن اولا
بیر دعاسی سـنه مـین سایه دی شهپردی آنا
قویما دیداریوه مأنوس اولا چوخ حسرتیلن
تابی یوخدور دوزه،هجران غمی پروردی آنا
آغلاسا قـویـماگیلان اشـکین عذاره اَلَسین
اورگـی یاره لـیـدی مـنبـع غـملـردی آنا
سنسن امّید و نشاطی ،گوزونه نـور و ضیـا
سـنسـیز اولـسا بیلوسن بیکس ویاوردی آنا
روز مادردی بو گون بیردنه گول باغلاد آپار
قویما سینسین اورگی قوش کیمی پرپردی آنا
آلگیلان گویلون اَلـه تـاج سریمسـن ده مـنیم
شـرف و عـزت و شـخصـیّـته مـظهـردی آنا
اول مواظب عملیدن اِلـه حفـظ حـرمـتیـنـی
قویما سولسون اورگی غنچه کیمی تردی آنا
دوت الینن که سنین چوخلی دوتوبدور الیوی
حاجتـیـن ایـلـه روا پـاک و مطـهـردی آنا
دوقوز آی حمل ایلیوبدور سنی بطنینده هـلـه
ایکی ایل صود وئروب آیینه ی اختردی آنا
دانیشاندا سویونـوب گـه یئرییَـنـده سویونوب
سـنی هـر صـبح مـسا عشقیله گوزلردی آنا
گه قوجاغینده سنه لای لایی گوز یاشلی دئیوب
گهی گهوارده ، شیـریـن سَسی دیلبردی آنا
اوقدر واردی مقامی نقدر یازسا قلم
گئنه ده کم گتیرور مین دَنه دفتردی آنا
بیرده حاشا گله دنیایه آنـا مثـلی بشـر
قالمیشـام من یازام آیا نَیه بنذردی آنا؟
ایستسون کوثری الله سنه اهدا ائلسون
اوپ الینن آناوین صاحب کوثردی آنا
اوپ اَیاقین سنه تا واجب اولا الماسـی
جنـت حق که سنه شافع محشردی آنا
✍اصغر الماسی اهری
